د اوبو او انرژي وزارت د انرژي معین د ترکیې د سوداګرو او صنعت کارانو خپلواکي ټولنې غړو ته په افغانستان کې د پانګونې د زمینې چمتو کولو ډاډ ورکړ

MEW-Media
Tue, Dec 14 2021 12:51 PM
23/9/1400

 

ښاغلی مولوي عارف الله عارف د اوبو او انرژي وزارت د انرژي معین په خپل کاري دفتر کې د ترکیې د سوداګرو او صنعت کارانو خپلواکي ټولنې غړو سره لیدنه ترسره کړه او په افغانستان کې د خصوصي سکتورونو د پانګونې په تړاو د انرژي د تولید په برخه کې بحث او دنظرونو تبادله وکړه.

په دغه لیدنه کې، مولوي عارف د ترکیې د سوداګرو او صنعت کارانو خپلواکې ټولنې په افغانستان کې د انرژي د پراختیا له لیوالتیا څخه قدرداني څرګنده کړه  او د شته زیرمو او په هیواد کې د انرژي د تولید وړتیا په یادولو سره، هغوی ته د پانګونې د زمینې چمتوکولو ډاډ ور کړ.

د انرژي معین په خپلو خبرو کې ټینګار وکړ چې، د اوبو او انرژي وزارت رهبري د انرژي د تولید په برخه کې د پانګونې هرکلی کوي او په دې برخه کې د پانګونې د زمینې په چمتوکولو کې هر راز همکاري ته چمتو دی.

په ورته وخت کې، د ترکیې د سوداګرو او صنعت کارانو خپلواکې ټولنې په افغانستان کې د انرژي د تولید په برخه کې د اوبو له زیرمو ، بادي، لمرېزې او د ډبرو سکرو په برخه کې د پانګونې لپاره لیوالتیا  څرګنده کړه.

په پای کې دواړو لوریو د چارو د پيل او چټکتیا په موخه د هوکړه لیک په لاسلیک کیدو باندې ټنیګار وکړ.

User account menu