د اوبو او انرژي وزارت او د دونګ فونګ الکتریک شرکت ترمنځ د همکاري هوکړه لیک لاسلیک شو

د اوبو او انرژي سرپرست وزیر محترم الحاج ملا عبداللطیف منصور د دونګ فونګ (Dongfang Electric Power) شرکت له مسؤل ښاغلي ژيا سره په افغانستان کې د بېلابېلو سرچنیو څخه د انرژي تولید په پروژو کې د پانګونې په موخه د ګډې همکاري هوکړه لیک لاسلیک کړ.

د اوبو او انرژي سرپرست وزیر د دغه هوکړه لیک د لاسلیک کولو پر مهال یادونه وکړه،چې اوسمهال په افغانستان کې له هره پلوه د پانګونې لپاره زمینه چمتو ده. ښاغلي منصور له نوموړي شرکت څخه وغوښتل چې د انرژي په تولید باندې د پانګونې ترڅنګ، د انتقالي مزو او د توزیعي سب سټیشنونو په پیاوړتیا باندې هم پانګونه وکړي، ترڅو د انرژي د جذب زمینه هممهاله د انرژي له تولید سره چمتو شي.

په ورته مهال، د نوموړي شرکت مسؤل د دغه هوکړه لیک له لاسلیک کېدو څخه په خوښي سره، د عملي چارو په چټکتیا باندې د اړینو اقداماتو د ترسره کولو په برخه کې ژمنه وکړه او د وزارت رهبري ته یې ډاډ ورکړ، چې په افغانستان کې د انرژي د تولید، پراختیا او لېږد په پروژو کې به پانګونه ځانګړې کړي. هغه همدارنګه ژمنه وکړه، چې د پروژو د پلي کېدو په برخه کې د نوې ټکنالوژي او د تجربه لرونکي او متخصص ځواک څخه کار اخلي.