د کندهار ولایت د ارغستان د لورې بند د پلي کولو لپاره د زمینې د برابرولو چارو د چټکتیا په موخه د همغږي ناسته ترسره شوه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د افغان جرمن باختر شرکت له مسؤلینو سره د کندهار ولایت د ارغستان د لورې بند د پلي کولو لپاره د زمینې د برابرولو چارو د چټکتیا په هکله بحث او د اندونو تبادله وکړه.
په دغه ناسته کې، د اوبو او انرژي سرپرست وزیر د نوموړي شرکت له مسؤلینو څخه وغوښتل چې ډېر ژر دې د خپلو تخنیکي مطالعاتو د سروې اسناد او راپورونه د وزارت له تخنیکي ټیم سره شریک کړي، ترڅو تر اړینو همغږیو وروسته، د قرارداد د لاسلیکولو او د عملي چارو د پیل په موخه وروستي اړین اقدامات تر لاس لاندې ونیول شي.
