د اوبو او انرژي سرپرست وزیر د ازبکستان د انرژي له وزیر سره وکتل.
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف منصور او مل پلاوي چې دا وخت د ازبکستان انرژي اوونۍ نړیوال فورم کې د ګډون په موخه د یاد هیواد په سفر بوخت دی، نن یې د ازبکستان د انرژي له وزیر ښاغلي جورابیک میرزا محمدوف سره لیدنه او خبرې وکړې.
په دغه مهمه لیدنه کې دواړو لوریو د افغانستان او ازبکستان تر منځ د انرژي سکتور په برخه کې د متقابلو اقتصادي ګټو، تخنیکي همکاریو او د دوامداره اړیکو په پیاوړتیا مفصل بحث او د نظرونو تبادله وکړه.
دواړو خواوو ټینګار وکړ چې انرژي نه یوازې د هیوادونو اقتصادي بنسټ دی، بلکې د سیمه ایز ثبات، پرمختګ او متقابل تفاهم لپاره یو ستراتيژیک عنصر هم بلل کیږي. محترم منصور صاحب د افغانستان اسلامي امارت هغه لیدلوری وړاندې کړ، چې له مخې یې افغانستان غواړي د انرژي په برخه کې همکارۍ پراخې کړي او له خپلو طبیعي سرچینو څخه سالمه ګټه واخلي. دغه لیدنه چې د تفاهم او صمیمیت په فضأ کې تر سره شوه، د افغانستان او ازبکستان تر منځ به د انرژي په برخه کې د همکاریو یو نوی فصل ثابت شي او دواړه هیوادونه به ترې اوږد مهاله ګټه واخلي، او د سیمې او نورو هیوادونو لپاره به هم د همکاري یوه بریالۍ بېلګه ثابته شي.
