خوست ولایت کې د ۳۸ پروژو چارې د ۱۲۰میلیونه افغانیو په لګښت پیل شوې
د خوست ولایت د مرکز او په سپیرې، تڼي، ګربز، علیشیر او ځاځي میدان ولسوالیو کې د ۳۸ پروژو چارې، چې ۲۳ یې د خوست د اوبو او انرژي ریاست اړوند دي، د ۱۲۰ میلیونه افغانیو په لګښت د قومونو او قبایلو وزارت چارو معین محترم الحاج مولوي محمد اسمعیل غزنوي، د خوست مرستیال والي محترم مولوي محبوب شاه قانت، د خوست د اوبو او انرژي رئيس محترم مولوي عبدالقیوم ثابت او یو شمېر نورو سیمه ایزو مسؤلینو په شتون کې پیل شوې.
په دغو پروژو کې د اوبو رسولو ۲۰ پروژې، د یوه کانال ترمیم، د یوه استنادي دېوال او ۲ سربندونو د ترمیم، د سړک جغل اندازي، د ۳ جوماتونو او ۱۰ مدرسو او ښونځیو جوړولو پروژې شاملې دي.
د نوموړو پروژو چارې به د څلورو میاشتو په موده کې بشپړې او ګټې اخیستنې ته وسپارل شي، چې ګټې ته په سپارلو سره به یې سلګونو کورنیو ته د پاکو اوبو رسولو آسانتیاوو چمتو کېدو ترڅنګ، زرګونه جریبه ځمکې خړوبې شي.
