بدخشان ولایت ته د ۶۳۱ میلیون امریکایي ډالرو په ارزښت د برښنا رسونې پروژې قرارداد لاسلیک شو.
د خصوصی او عامه ګډون له لاری د مالیی وزارت او د آغا خان پراختیایي بنسټ ترمنځ بدخشان ولایت ته د ۶۳۱ میلیون امریکایي ډالرو په ارزښت د برښنا رسونې پروژې قرارداد د خصوصی او عامه ګډون له لاری پرون د چنګاښ میاشتې په ۳۱ مه نېټه لاسلیک شو.
د قرارداد لاسلیکولو په مراسمو کې د مالیې وزارت سرپرست ښاغلي پروفیسور محمد همایون قیومي، د اوبو او انرژۍ وزارت سرپرست ښاغلی انجنیر محمد گل خُلمی او اغاخان پراختیایي بنسټ اجرائیوي رئیس ښاغلي لطاف کاسم، د افغانستان برښنا شرکت عمومي رئیس ښاغلي امان الله غالب، په ولسي جرګه کې د بدخشان ولایت د خلکو استازو او نور چارواکي ګډون کړی وو.
د مالیې وزارت سرپرست د قرارداد لاسلیکولو په اړه وویل:" بدخشان ولایت ته د برښنا رسونې په پروژه کې د لېږد کرښې جوړښت، د تولید او وېش شبکې او د دې ولایت په ټولو ولسوالیو کې د اوبو برښنا پراخول شامل دي."
نوموړي زیاته کړه:" په ټولیزه توګه نوموړې پروژه کې د ۹۱ میګاواټه برښنا تولید، د ۱۱۰ کلیو ولټه برښنا لېږدولو کرښه او د بدخشان ولایت ټولو ولسوالیو ته د برښنا وېشل شامل دي، چې د عامه او خصوصي مشارکت له لارې پلي کېږي.
په ورته وخت کې د اغاخان بورډ اجرائیوي بورډ رئیس وویل:" بدخشان ولایت ته د برښنا رسونې پروژې پلي کول، د دې ولایت د خلکو اړتیاوو پوره کولو ترڅنګ په نورو بنسټیزو سکټورونو هم اغېز لري. موږ غواړو د افغانستان له حکومت سره په ګډه دغه پروژه پلي کړو.
د یادونې وړده، چې د دې پروژې د قرارداد موده ۳۰ کاله ده او په څو پړاوونو کې به پلي شي او هر پړاو یې اووه کاله نیسي.
