په کابل ښار کې د ځمکې لاندې اوبو سرچینو د ککړتیا او ورڅخه د بې رویې ګټې اخیستني د مخنیوي په هکله د عامه پوهاوي برنامه ترسره شوه
یاده برنامه د اوبو او انرژي وزارت د ځمکې لاندې سرچینو رئيس محترم انجنیر عزیزالرحمن عزیز، د کابل ښاروالي د ټولنیزو او کلتوري چارو مرستیال ښاغلي مولوي حبیب الرحمن منصور ، د کابل ښار د ۲۱ ناحیې د ګذر وکیلانو او خلکو په ګډون ترسره شوه.
په دې برنامه کې د ځمکې لاندې اوبو سرچینو د ککړتیا او ورڅخه د بې رویې ګټې اخیستنې د مخنیوي، د جذبي څاه ګانو د اهمیت او د کېندلو د څرنګوالي، په کابل ښار کې د ځمکې لاندې اوبو سرچینو د موجوده وضعیت او د ځمکې لاندې اوبو سرچینو د تغذیې او پیاوړتیا د لارو چارو په هکله بشپړ معلومات د یوه پرزنټیشن په ترڅ کې د ځمکې لاندې اوبو سرچینو د رئيس له خوا ګډون والو ته وړاندې شول.
په ورته مهال، د کابل ښاروالي د ټولنیزو او کلتوري چارو معین په یاده برنامه کې د کابل ښار د ۲۱ ناحیې له اوسیدونکو څخه و غوښتل چې د ځمکې لاندې اوبو سرچینو د پياوړتیا په موخه دې جذبي څاه ګان د خپلو اوسیدولوځایونو په انګړ کې وکني او د باران او واورې اوبه دې پکې وبهوي او د ځمکې لاندې اوبو سرچینو د ککړتیا او ورڅخه د بې رویې ګټې اخیستنې د مخنیوي په برخه کې د اسلام سپیڅلي دین د لارښوونو سره سم عمل وکړي
