د اوبو او انرژي وزارت د خپرونکي ارګان علمي همکاران د ستاینلیکونو په ورکولو سره وستایل شول
د یو لړ ځانګړو مراسمو په ترڅ کې، ۳۰ تنه هغو کسانو ته چې د اوبو او انرژي وزارت د اطلاعاتو او نشراتو ریاست سره د خپلو علمي او تخصصي مقالو په شریکولو سره همکاري کړې وه، د دغه وزارت د رهبري مقام له لوري ستاینلیکونه ورکړل شول.
دغه ستاینلیکونه په یوه غونډه کې په داسې حال کې چې د وزارت د رهبري مقام سلاکار محترم ډاکټر فاروق اعظم، رئیسانو او یو ګڼ شمېر نورو تخنیکي مسؤلینو هم ګډون درلود، د اوبو او انرژي وزارت د دفتر عمومي رئيس محترم قاري محمد عبدالعزیز عزیز او د دغه وزارت د اطلاعاتو او نشراتو رئيس محترم الحاج غلام جیلاني حق پرست له لوري ووېشل شول.
د وزارت د رهبري مقام سلاکار محترم ډاکټر فاروق اعظم په دغو مراسمو کې د علم او پوهې پر ارزښت باندې ټینګار وکړ او د علم او پوهې شریکول تر ټولو غوره جاریه صدقه وبلله. هغه زیاته کړه، چې د پوهې او علمي څېړنو خپرول د هېواد په پرمختګ کې ځانګړی ځای لري.
همدارنګه، د اوبو او انرژي وزارت د دفتر عمومي رئيس محترم قاري محمد عبدالعزیز عزیز په هېواد کې د اوبیزو سرچینو او انرژي پراختیا د مدیریت پر ازښت باندې ټینګار وکړ او یادونه یې وکړه، چې په دې برخه کې هر ډول علمي او تخنیکي اطلاعات لوړ ارزښت لري، او زیاته یې کړه، چې د دغې پوهې شریکول کولای شي په افغانستان کې د اوبو د مدیریت او برېښنا انرژي په پراختیا کې مرسته وکړي.
په ورته مهال، د اوبو او انرژي وزارت د تدارکاتو رئيس محترم مولوي عزیزالله سهار هم په دغو مراسمو کې د علمي او تخنیکي پوهې د شریکولو پر اړتیا باندې ټینګار وکړ او د دیني او معاصرو علومو د زده کړې ترلاسه کول د نظام د پياوړتیا او د هېواد د پراختیا لپاره اړین وبلل.
له بلې خوا، د اوبو او انرژي وزارت د اطلاعاتو او نشراتو رئيس محترم الحاج غلام جیلاني حق پرست د "اوبه او انرژي" فصلنامې لپاره د دغو کسانو د علمي مقالو د شریکولو قدردانۍ وکړه او هغوی یې د دغو علمي همکاریو دوام ته وهڅول.
دغه مراسم د ګډونوالو د علمي هڅو په قدردانۍ او د هېواد د اوبیزو او انرژي سرچینو د غوره مدیریت په برخه کې د علمي او څېړنیزو همکاریو پر دوام د اوبو او انرژي وزارت د دعوت او ارشاد رئيس محترم مفتي ګل رحمن عارف په دعائیې سره پای ته ورسیدل.
