د انرژي معینیت او د هېواد انرژي شرکت د مسؤلینو ترمنځ په غور ولایت کې د 1.859 میلیارده افغانیو په ارزښت د برېښنا له بېلابېلو سرچینو څخه د انرژي د تولید په برخه کې د پانګونې په هکله ناسته ترسره شوه
دغه ناسته د اوبو او انرژي وزارت د انرژي معین محترم مولوي حمدالله زاهد، د غور والي محترم ملا احمد شاه دین دوست ، د انرژي معینیت د رئيسانو، تخنیکي مسؤلینو او د هېواد انرژي شرکت د مسؤلینو په شتون کې ترسره شوه او د هېواد انرژي شرکت له لوري د 1.859 میلیارده افغانیو په ارزښت له اوبېزو، بادي او لمریزو سرچینو څخه د برېښنا انرژي د تولید په هکله بحث او اندونو تبادله وشوه.
په دغه ناسته کې، د اوبو او انرژي وزارت د انرژي معین د نوموړي شرکت د پروپوزل د هرکلي ترڅنګ وویل اړتیا ده چې د برېښنا انرژي په برخه کې د هېواد د ځان بسیاینې په موخه له کورنیو سرچینو څخه ګټه پورته شي.
همدارنګه، د غور والي په دغه ناسته کې برېښنا انرژي ته د غور ولایت د خلکو اړتیاوې او په دې برخه کې د پانګونې فرصتونو ته اشاره وکړه او په دې برخه کې د اوبو او انرژي وزارت او خصوصي شرکتونو د لا زیاتې پاملرنې غوښتنه وکړه.
د یادونې وړ ده، چې د هېواد انرژي شرکت د 1.859 میلیارده افغانیو په پانګونې سره په پام کې لري په غور ولایت کې ۳۰ میګاواټه برېښنا له اوبېزو، بادي او لمریزو سرچینو څخه تولید کړي او تر دې مخکې یې خپل پروپوزل د اوبو او انرژي وزارت ته سپارلی دی.
