هرات ولايت کې دپاشدان بند پروژې دپاتې چارو پرانيسته وشوه
نن د هرات د پاشدان بند پروژې پاتې چارې د ریاست الوزراء د اقتصادي مرستیال محترم ملا عبدالغني برادر آخوند، د اوبو او انرژي سرپرست وزیر محترم ملاعبداللطیف منصور، د اوبو او انرژي وزارت د اوبو معین محترم مجیب الرحمن آخندزاده، د هرات والي محترم نوراحمد اسلام جار او د هرات د سپين ږیرو او مشرانو په شتون کې پرانيستل شوه.
غونډه لومړی د قران عظیم الشان په مبارکو ایاتونو په تلاوت سره پيل شوه، وروسته د پروژې د قراردادي شرکت استازي میلمنو ته وینا وکړه او د پروژې د پاتې چارو د بشپړولو لپاره یې ژمنه وکړه.
همدارنګه د یاد شرکت استازي وویل چې په دې پروژه کې په لسګونه افغاني او بهرني انجنیران کار کوي.
همدارنګه تر هغه وروسته د هرات والي محترم نوراحمد اسلام جار میلمنو ته ښه راغلاست وويل او له قراردادي شرکت څخه یې مننه وکړه چې د پروژې د تکمیل لپاره ټولې هڅې کوي.
وروسته د اوبو او انرژي سرپرست وزیر محترم ملاعبداللطیف منصور وینا وکړه. محترم وزیر صاحب په خپله وینا کې وویل چې اسلامي امارت خلکو ته امنیت تامین کړی دی او د معیشت د تامین لپاره په مختلفو ولایتونو کې لویې، متوسطې او کوچنۍ پروژې په کار اچولي دي. هغه زياته کړه چې په راتلونکې کې به د اوبو او انرژي وزارت په هرات او نورو ولایتونو کې نورې پروژې هم افتتاح کړي. همدارنګه وزیر صاحب په پای کې له خلکو غوښتنه وکړه چې د اسلامي امارت له پالیسیو او برنامو څخه ملاتړ وکړي.
د غونډې په وروستۍ برخه کې د اسلامي امارت د ریاست الوزراء اقتصادي مرستیال محترم ملا عبدالغني برادر اخوند وینا وکړه. ملا صاحب وویل چې اسلامي امارت د اوبو د مدیریت لپاره ژمن دی او په دې اړه چې کوم پلانونه او برنامې په پام کې نیول شوې دي پلي کېږي به. همدارنګه ملا صاحب زیاته کړه چې د هرات خلکو د اسلام لپاره ډېرې قربانۍ ورکړې دي او له همدې امله باید د دوی لاس ونیول شي. نوموړي په پای کې وویل چې اسلامي امارت ژمن دی چې ټولې نیمګړې او ناتکمیلي پروژې تکمیلې کړي. نوموړي له هېوادوال شرکت څخه غوښتنه وکړه چې د پاشدان بند پروژه په صادقانه توګه د مشخصاتو مطابق په خپل وخت بشپړه کړي.
د غونډې په دوهمه برخه کې مشرانو د بند له مختلفو برخو څخه لیدنه وکړه او د بند سر ته يې تشریف یووړ او پروژه یې په رسمي توګه پرانيسته.
