په سمنګان ولایت کې یو ذخیروي بند او شپږ چکډمونه د ۷۱ میلیون افغانیو په ارزښت ګټې اخیستنې ته وسپارل شول
نوموړې پروژې د اوبو او انرژي د سرپرست وزیر محترم الحاج ملا عبداللطیف منصور، د سمنګان والي محترم داملا شعیب رسالت، د اوبو او انرژي وزارت سلاکار محترم ډاکټر فاروق اعظم، د شمال سیندیزې حوزې عمومي رئيس محترم انجنیر رفیع الله مجتبی، د بلخ سیندیزې فرعي حوزې رئيس محترم مولوي موسی جان حقبین، د سمنګان سیندیزې فرعي حوزې رئيس محترم قاري محب الله عادل، د بغلان سیندیزې فرعي حوزې رئيس محترم محمد عمر انس او د هغه ولایت د یو شمېر مشرانو او اوسېدونکو په شتون کې ګټې اخیستنې ته وسپارل شوې.
د اوبو او انرژي سرپرست وزیر د اسپند سای ذخیروي بند په هکله خبرې وکړې او زیاته یې کړه، چې دغه ذخیروي بند د یو ملي سوداګر له لوري د ۲۷ میلیونه افغانیو په لګښت د سل زره متره مکعب اوبو د ذخیره کولو په وړتیا د یو کال په موده کې بشپړ او ګټې اخیستنې ته وسپارل شو.
همدارنګه د اوبو او انرژي سرپرست وزیر وویل، چې په ۱۴۰۳ کال کې هم د چکډمونو ۶ پروژې د ۴۴ میلیون افغانیو په ارزښت د ۸۵۵۰۰ متر مکعب اوبو د ذخیره کولو په وړتیا بشپړ او ګټې اخیستنې ته وسپارل شول.
په نوموړې پروژه کې سلګونو کسانو ته د کار زمینه چمتو شوې وه، چې ګټې ته په سپارلو سره به یې کابو ۳۸۸۲ کورنۍ ورڅخه برخمنې شي.
