په تورخم ښارګوټي کې له پاکستان هېواد څخه د را ستنو شوو افغان مهاجرینو لپاره د څښاک یخو اوبو برابرولو سیسټم فعال شو
د ننګرهار ولایت د اوبو او انرژي رئيس محترم سید فضل احد هاشمي د ننګرهار ولایت د یخو فابریکو له مسؤلینو سره وکتل او له پاکستان هېواد څخه د راستنو شوو افغان مهاجرینو لپاره د څښاک یخو اوبو برابرولو سیسټم په هکله بحث او د اندونو تبادله وکړه.
د دغې ناستې په پایله کې د یخو فابریکو مسؤلینو ژمنه وکړه، چې هره ورځ به له پاکستان هېواد څخه د راستنو شوو افغان مهاجرینو د څښاک اوبو ستونزې د هوارولو په موخه شاوخوا څلور سوه د یخ تختې او د اوبو ذخیره کولو بیلرونه د تورخم ښارګوټي ته ور ولېږي.
همدارنګه، ښاغلي هاشمي د راستونو شوو افغان مهاجرینو ستونزې هم واوریدې.
د یادونې وړ ده، چې تېره ورځ د اوبو او انرژي سرپرست وزیر محترم الحاج ملا عبداللطیف منصور په تورخم ښارګوټي کې له پاکستان هېواد څخه د راستنو شوو افغان مهاجرینو له پنډغالي څخه لیدنه وکړه او د هغوی ستونزې واورېدې او اړوندو مسؤلینو ته یې د هغوی د ستونزو د هوارولو په موخه اړینې لارښوونې وکړې.
