اوبو او انرژي وزارت کې د امر بالمعروف او نهي عن المنکر د قانون د ښه پلي کولو په موخه ناسته ترسره شوه
دغه ناسته د اوبو او انرژي وزارت د مالي او اداري عمومي رئيس محترم قاري نجیب الله مبارک تر مشري لاندې د دعوت او ارشاد رئيس محترم مولوي ګل رحمن عارف، د کارکوونکو چارو رئيس محترم ملا عبدالقدیم لیاقت عمر او د وزارت د جومات د امام محترم قاري سید هارون په شتون کې ترسره او د امر بالمعروف او نهي عن المنکر د قانون د ښه پلي کولو په موخه بحث او د اندونو تبادله وشوه.
په دغه ناسته کې پرېکړه وشوه، چې ټول کارمندان باید خپلې ظاهري بڼې د اسلامي شریعت له اصولو سره سم برابر کړي، که چېرې د کوم کارمند ظاهري بڼه د اسلامي شریعت له اصولو سره سمون ونهلري، نو د دعوت او ارشاد ریاست د کارمندانو له لوري به ورڅخه د هویت کارت واخیستل شي او د اصلاح د تضمین تر اخېستلو وروسته به بېرته کارت ورکړل شي او د بیا ځلې تکرار په صورت کې به له کړنلارو سره سم له دندې څخه منفک شي.
همدغه راز، په دغه ناسته کې د کارمندانو د معنوي روزنې او د دعوت او ارشاد ریاست د ښوونیز نصاب د منظم پلي کولو لپاره د میکانیزم د چمتوکولو په هکله هم خبرې، اترې وشوې.
