خوست ولایت کې د یوه چکډم پروژې چارې د څه د پاسه 3.9 میلیونه افغانیو په لګښت سره پیل شوې
د یاد چکډم پروژه د خوست ولایت د قلندر ولسوالي په اسمان کوټ کلي کې د شمل خرم فرعي سیندیزې حوزې ریاست مسؤولینو، د قراردادي شرکت مسؤولینو، د سیمې قومي مشرانو او ځوانانو په شتون کې پرانیستل شوه.
د نوموړي چکډم چارې د یادې سیندیزې حوزې تر څارنې لاندې د اوبو او انرژي وزارت پراختیایي بودجې څخه د څه د پاسه د 3.9 میلیونه افغانیو په لګښت د یوه کورني شرکت له لوري ترسره کېږي.
دغه چکډم د 25 متره اوږدوالي،په تهداب کې د 3.9 متره او په پورتنۍ برخه کې 80 سانتي متره پلنوالي او ۶ متره لوړوالي په درلودلو سره د شاوخوا 1294 مترمکعبه اوبو د ذخیره کولو او په لسګونه جریبه ځمکې د خړوبولو ظرفیت لري، چې د رغولو په چارو کې به یې لسګونو کسانو ته د کار زمینه برابره شي او چارې به یې په راتلونکو دریو میاشتو کې بشپړې شي.
