د آمو سیند څنډو د ټینګښت رئیس د جوزجان له والي سره د لیدنې سربېره د دغه ولایت له یو شمېر سیمو څخه هم لیدنه وکړه
د آمو سیند څنډو د ټینګښت رئیس محترم مولوي وکیل احمد نقي او ورسره مل د دغه ریاست د پلان او انجنيري آمر محترم انجنير بريالی طاهري جوزجان ولایت ته د سفر په ترڅ کې د دغه ولایت له والي محترم قاري ګل حیدر شفق سره وکتل او د دغهٔ ریاست د مسؤولیتونو او راتلونکو پلانونو په ځانګړې توګه د آمو سیند د حریم او بستر په تړاو یې اړین معلومات د جوزجان له والي سره شریک کړل او ښاغلي شفق هم د پوره همکاري ژمنه وکړه.
همدارنګه ښاغلي نقي د جوزجان ولایت په قرقین ولسوالي کې د دغهٔ ریاست د سیمه ایز آمریت کارکوونکو ته د چارو د غوره پرمخ وړلو په موخه اړینې لارښوونې وکړې. د نوموړي آمریت مسؤولینو خپلې ستونزې او وړاندیزونه له ښاغلي نقي سره شریک کړل، په ورته مهال ښاغلي نقي هم د هغوی ستونزو او وړاندیزونو ته د رسیدګي ژمنه وکړه.
همدارنګه د آمو سیند څنډو د ټینګښټ رئیس د خپل سفر په دوام کې خامیاب ولسوالي ته سفر وکړ او د آمو سیند د ویجاړیو په هکله یې د خامیاب له ولسوال محترم ملا عبدالمجید سعادت او د سیمې له یو شمېر مشرانو سره وکتل.
