د افغانستان برېښنا شرکت د مديره پلاوي دوهمه ناسته ترسره شوه
دغه ناسته د اوبو او انرژي سرپرست وزير او د افغانستان برېښنا شرکت د څارپلاوي رئيس محترم الحاج ملا عبداللطيف منصور تر رهبري لاندې د ماليې وزارت د عوايدو او ګمرکاتو معين محترم ملا عبدالقاهر ادريس، دصنعت او سوداګري وزارت معين محترم مولوي قدرت الله جمال، د مديره پلاوي ، د اوبو او انرژي وزارت او د افغانستان برېښنا شرکت د يو شمېر نورو مسٶلينو په ګډون ترسره شوه
په دغه ناسته کې، د افغانستان برېښنا شرکت د بېلابېلو موضوعاتو لکه، د انرژي خدمتونو دتنظيم دقانون پر بنسټ دنوموړي شرکت د جواز د موضوع، د هغه پر پروژو باندې د پانګونې د څرنګوالي، د افغانستان برېښنا شرکت د اساسنامې د تعديل د وروستي کولو، دټاپ پروژې د اقتصادي مطالعاتو، د برېښنا د ضايعاتو د مخنيوي د طرحې د چمتوکولو، له 1397تر 1399 کال پورې د نوموړي شرکت د مالي راپورونو د څېړنې او د هغوى په هکله د تخنيکي اندونو د وړاندې کولو، پر دولتي او خصوصي شرکتونو باندې د افغانستان برېښنا شرکت د پورونو او هغه شرکت پورې اړوندو يو شمېر نورو موضوعاتو په هکله بحث او د اندونو تبادله وشوه
په جلا توګه د هرې موضوع تر هر اړخيزې څېړلو او د اندونو تر تبادلې وروسته، د هغوى په هکله اړين تصمیمونه ونيول شول.
