د انرژي معینیت اونیزه اداري او تخنیکي ناسته ترسره شوه
دغه ناسته د اوبو او انرژي وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشري لاندې د دغه معینیت د رئيسانو او یو شمېر نورو مسؤلینو په ګډون ترسره شوه.
د دغې ناستې په پيل کې، د دفتر عمومي رئيس او د انرژي معینیت وارسي کوونکي د انرژي سکتور د پراختیا د پنځه کلن پلان د پلي کولو، د چارو د لومړیتوبونو، د ستونزو د پېژندلو او د شته ننګونو د هوارولو په موخه د شونو حل لارو د رامنځته کولو په هکله خبرې وکړې او د ناستې غړو ته اړینې سپارښتنې وکړې.
په دغه ناسته کې، د رئيسانو له لوري د انرژي پروژو اړوند څو بېلابېل تخنیکي موضوعات مطرح شول او په هکله یې بحث او د اندونو تبادله وشوه.
همدارنګه په دغه ناسته کې د انرژي معینیت د پروژو د پلي کولو لپاره د یوه په کار پوه ټیم د رامنځته کولو، د دغه معینیت اړوند ریاستونو د کاري بهیر د څارنې، د برېښنا شرکت او نورو کورني شرکتونو لپاره چې د انرژي په برخه کې فعالیت کوي د یوه کره میکانیزم د رامنځته کولو او همدارنګه د چارو په ترسره کولو کې د لا زیاتو همغږیو په هکله خبرې، اترې وشوې او د نوموړو موضوعاتو د لا غوره ترسره کولو لپاره اړین تصمیمونه ونیول شول.
