د انرژي معینیت د غونډو سرپرست او د دغه معینیت یو شمېر رئيسانو د یوه ترکي شرکت له مسؤلینو سره د انرژي په پروژو کې د پانګونې په هکله بحث او د اندونو تبادله وکړه
د انرژي معینیت د غونډو سرپرست او د پایدارې انرژي عمومي رئیس محترم مولوي عزیزالله سهار او د دغه معینیت یو شمېر نورو رئيسانو د مرصوص شرکت له مسؤلینو سره چې د ترکيې د کارموندنې او سوداګري اخلاق د ټولنې غړیتوب لري؛ لیدنه وکړه او د انرژي په پروژو کې يې د پانګونې په هکله خبرې، اترې وکړې.
په دغه لیدنه کې، د انرژي معینیت د غونډو سرپرست هغوی ته ډاډ ورکړ، چې د اوبو او انرژي وزارت په هېواد کې د انرژي د پراختیا په برخه کې د هغوی د لېوالتیا هرکلی کوي او په دې برخه کې به هر راز همکاري ته چمتو وي.
په ورته مهال، د نوموړې ټولنې یو مسؤل په هېواد کې د انرژي په پروژو کې د خپلې پانګونې لېوالتیا په څرګندلو سره په دې برخه کې خپله همکاري څرګنده کړه.
