د اوبو او انرژي سرپرست وزیر د افغانستان د بلوچانو د سرتاسري شورا له رئيس او غړو سره د اوبو او برېښنا په برخه کې د هغوی د ستونزو د هوارولو په هکله خبرې وکړې
د اوبو او انرژي سرپرست وزیر محترم الحاج ملا عبداللطیف منصور د افغانستان د بلوچانو د سرتاسري شورا له رئیس او غړو سره چې له څو ولایتونو څخه دغه وزارت ته راغلي وه، لیدنه وکړه.
په دغه لیدنه کې، د نوموړې شورا رئيس او غړو د اوبو د کموالی او برېښنا ته د نه لاسرسي په برخه کې خپلې ستونزې او وړاندیزونه د وزارت د رهبري له مقام سره شریک کړل.
د اوبو او انرژي سرپرست وزیر هغوی ته ډاډ ورکړ، چې اسلامي امارت د هېواد لرو پرتونو او محرومو ولسوالیو ته ځانګړې پاملرنه لري او په دې برخه کې یو مشخص کمېسیون هم جوړ کړی، ترڅو د هغو ولسوالیو ستونزو ته رسیدګي وشي. هغه زیاته کړه، چې د هغوی د ستونزو د هوارولو په برخه کې به چې په دغه وزارت پورې اړوند وي، شته امکاناتو ته په کتوسره رسیدګي وشي.
