د اوبو او انرژي سرپرست وزیر د جوزجان له والي سره وکتل
د اوبو او انرژي سرپرست وزیر محترم الحاج ملا عبداللطیف منصور دهېواد شمال ولایتونو ته د خپل سفر په لړ کې د جوزجان له والي محترم قاري ګل حیدر شفق سره په داسې حال کې چې د شمال سیندیزې حوزې عمومي رئيس محترم انجنیر رفیع الله مجتبی او د جوزجان سیندیزې فرعي حوزې رئيس محترم ملا سعدالدین سلیمي یې ملتیا کوله وکتل او په یاد ولایت کې د اوبو او انرژي پروژو د پلي کولو په هکله بحث او د اندونو تبادله وکړه.
په دغه لیدنه کې، د جوزجان والي د اوبو او برېښنا پروژو د پلي کولو په برخه کې د دغه ولایت د خلکو اړتیاوي او غوښتنې د اوبو او انرژي له سرپرست وزیر سره شریکې کړې.
په ورته مهال، د اوبو او انرژي سرپرست وزیر د جوزجان والي ته ډاډ ورکړ چې د شته امکاناتو او متوازنې پراختیا په پام کې نیول سره به د اوبو او برېښنا پروژو د پلي کولو په برخه کې د دغه ولایت د خلکو اړتیاوو او غوښتنو ته رسیدګي وشي.
