د اوبو او انرژي سرپرست وزیر د خاتم الانبیأ دارالایتام او حبیب الله زرمتي لیسې څخه لیدنه وکړه.
د اوبو او انرژي سرپرست وزیر محترم الحاج ملا عبداللطیف منصور نن د پکتیا ولایت د زرمت ولسوالي د خاتم الانبیأ دارالایتام څخه لیدنه وکړه، استادانو او شاګردانو ته یې د تعلیم او تعلم په هکله لازمې لارښوونې وکړې او دغه راز محترم وزیر صاحب له خپلې خوا د یاد دارالایتام زده کوونکو ته د راتلونکي کوچني اختر لپاره جامې ډالۍ کړې او شاګردان یې د کوچني اختر په مناسبت د رخصتیو په پار کورونو ته رخصت کړل.
دغه راز محترم وزیر صاحب د یاد سفر په بهیر کې د زرمت ولسوالي د حبیب الله زرمتي ليسې څخه لیدنه وکړه، دغلته یې د یادې لیسې د حفظ او مراقبت چارې وکتلې، د یادې لیسې آمر او ښوونکو ته یې توصیه وکړه چې د شاګردانو په ښوونه او روزنه کې خپلې ټولې شونې هڅې په کار واچوي تر څو خپل شاګردان په دیني او ملي روحیه سمبال، ټولنې ته د خدمت لپاره وړاندې کړي.
محترم وزیر صاحب دوی ته له خپلې خوا د هر ډول همکاري ډاډ ورکړ.
