د اوبو او انرژي سرپرست وزیر د سرپل له والي سره په هغه ولایت کې د اوبو او انرژي پروژو په هکله بحث او د اندونو تبادله وکړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د سرپل له والي محترم الحاج مولوي محمد ظریف مظفر سره وکتل.
په دغه لیدنه کې، د سرپل والي د اوبو او انرژي پراختیایي پروژو په برخه کې د هغه ولایت د خلکو ستونزې او اړتیاوې د اوبو او انرژي له سرپرست وزیر سره شریکې کړې او په هغه ولایت کې د سلطان ابراهیم بند پروژې د پلي کولو غوښتنه وکړه.
د اوبو او انرژي سرپرست وزیر د سرپل والي ته ډاډ ورکړ، چې د هېواد په محرومو او لرې پرتو ولایتونو کې د پراختیایي پروژو پلي کول چې سرپل ولایت هم په دغه کټګورۍ کې شامل دی، د دغه وزارت په لومړیتوبونو کې ځای لري، په همدې موخه به د دغه وزارت له لوري اړینې هڅې ترسره شي، ترڅو ډېر ژر په نوموړي ولایت کې د سلطان ابراهیم بند د پلي کولو لپاره زمینه چمتو او چارې یې پیل شي.
