د اوبو او انرژي سرپرست وزیر د سیندیزو حوزو د اوبو د سرچینو له ۴۰ تنو آمرینو او انجنیرانو سره وکتل
د اوبو او انرژي سرپرست وزیر محترم الحاج ملا عبداللطیف منصور د سیندیزو حوزو د اوبو د سرچینو له ۴۰ تنو آمرینو او انجنیرانو سره چې د وړتیا لوړونې په څلور ورځني ورکشاپ کې ګډون کړی وو، له نږدې خبرې وکړې او د هغوی ستونزې او وړاندیزونه له نږدې وپوښتل.
د اوبو او انرژي سرپرست وزیر په دغه لیدنه کې، د وړتیا لوړولو ورکشاپونو ارزښت ته اشاره وکړه او همدارنګه په دغه ناسته کې په مرکز او سیندیزو حوزو کې د دغه وزارت د کارمندانو فعالیتونه د ستاینې وړ وبلل.
د اوبو او انرژي سرپرست وزیر د آمرینو او انجنیرانو د هڅونې ترڅنګ، د هېواد د آبادۍ په لاره کې هڅه انساني او ایماني مسؤلیت وباله او د اقلیمي بدلونونو او پرله پسي وچکالیو په پام کې نیولو سره د اوبو د مدیریت په برخه کې کار اړین او ستر مسؤلیت وباله. هغه همدارنګه د هغوی د ستونزو او وړاندیزونو په هکله ډاډ ورکړ، چې د شته امکاناتو په پام کې نیولو سره به د دوی ستونزو ته اړینه رسیدګي وشي.
