د اوبو او انرژي سرپرست وزیر په افغانستان کې د ترکیې هېواد د مؤسیات سوداګرو د ټولنې له استازي سره وکتل
د اوبو او انرژي سرپرست وزیر محترم الحاج ملا عبداللطیف منصور، په افغانستان کې د ترکیې هېواد د مؤسیات سوداګرو د ټولنې له استازي محترم فاتح چایه باتمز او د یادې ټولنې له غړي محترم عمر ایلدریم سره وکتل او د اوبو، ګازو او ډبرو سکرو څخه د برېښنا انرژي د تولید په پروژو کې د پانګونې په هکله بحث او د اندونو تبادله وکړه.
په یاده کتنه کې، د نوموړې ټولنې استازي د اوبو، ګازو او ډبرو سکرو څخه د برېښنا انرژي د تولید په پروژو کې د پانګونې لیوالتیا څرګنده کړه او په دې برخه کې یې د اوبو او انرژي وزارت له رهبري څخه د همکاري غوښتنه وکړه.
په عین حال کې، د اوبو او انرژي سرپرست وزیر په افغانستان کې د ترکي پانګه والو د رغنده کارکردګیو ستاینه وکړه او ویې ویل چې د اوبو او انرژي وزارت رهبري مقام د برېښنا انرژي د تولید په برخه کې د پانګونې د زمینې په برابرولو کې هر ډول همکاري ته چمتو دی.
د یادې کتنې په پای کې هوکړه وشوه، چې د دواړو لورو تخنیکي ټیمونه دې د پروژو د تخنیکي موضوعاتو په هکله د بحث او خبرو اترو په موخه لیدنې ترسره کړي.
