د اوبو او انرژي سرپرست وزیر په زابل ولایت کې د توري ذخیروي بند د چارو له بهیر څخه لیدنه وکړه
د اوبو او انرژي سرپرست وزیر محترم الحاج ملا عبداللطیف منصور د ترنک قلات سیندیزې فرعي حوزې رئيس محترم ملا عبدالکریم ذوالفقار او یو شمېر نورو مسؤلینو په ملتیا د زابل ولایت د توري ذخیروي بند د چارو له بهیر څخه لیدنه وکړه او اړوندو مسؤلینو ته ېې د نوموړي بند د پاتې چارو د بشپړولو په هکله اړینې لارښوونې وکړې او په زابل ولایت کې یې د ۱۰ میګاواټه لمریزې برېښنا پروژې د چارو د پیل خبر ورکړ.
همدغه راز، د اوبو او انرژي سرپرست وزیر د ترنک قلات سیندیزې فرعي حوزې له رئیس او کارمندانو سره په لیدنه کې د ورسپارل شوو مسؤلیتونو د پر وخت ترسره کولو او د خلکو ستونزو ته د ژر تر ژره رسیدګي د ټینګار ترڅنګ په هېواد کې د بندونو د جوړولو د ارزښت او د اوبو د هر اړخیز مدیریت په هکله خبرې وکړې او زیاته یې کړه، چې په نږدې راتلونکي کې به د خرني اوبو او برېښنا بند تخنیکي سروې چې په زابل ولایت کې ترټولو ستر بند دی، پیل شي.
په ورته مهال، د اوبو او انرژي سرپرست وزیر په دغه لیدنه کې د اسلامي نظام د ارزښت، موخو او تېرو مبارزو په هکله په مفصله توګه خبرې وکړې.
