د اوبو او انرژي وزارت، افغان انویست او عمران جیوتخنیک شرکتونو تر منځ درې اړخیز تړون لاسلیک شو
یاد تړون د کندهار ولایت د ارغستان ولسوالي د لورې بند د تخنیکي مطالعاتو په موخه د اوبو او انرژي وزارت د سرپرست ښاغلي ملا عبداللطیف منصور، افغان انویست او عمران جیوتخنیک شرکتونو د رئیسانو ترمنځ په داسې حال کې چې د اوبو او انرژي وزارت معینانو او یو شمېر مسئولینو ګډون درلود، لاسلیک شو.
ښاغلي ملا عبداللطیف منصور د یاد تړون د لاسلیک پر مهال د اوبو د مدیریت په برخه کې د دې پروژې پلي کول یو مثبت ګام وباله او د اوبو او انرژي وزارت او د یادو شرکتونو مسئولینو ته یې د بریا غوښتنه وکړه.
د یادولو وړ ده چې د یاد تړون پر بنسټ د کندهار ولایت ارغستان ولسوالي د لورې بند د جیوتخنیک د سروې پروژه د څلور میلیونه افغانيو په ارزښت ترسره کیږي.
