د اوبو او انرژي وزارت اوبو معین په ترکیې هېواد کې د بېلابېلو ترکي ودانیزو شرکتونو له مسؤلینو سره وکتل
د اوبو او انرژي وزارت د اوبو معین محترم مجیب الرحمن عمر آخندازده او ورسره مل پلاوي ترکیې هېواد ته د خپل سفر په ترڅ کې د نوموړي هېواد په پلازمینه انقره کې د هایدرو ډيزاین، بارسو، سوایش او بیتیک ترکي ودانیزو شرکتونو له مسؤلینو سره وکتل او په افغانستان کې د پانګونې او د اوبو پروژو د پلي کولو په برخه کې د هغوی د کاري تجربو شریکولو په هکله بحث او د اندونو تبادله وکړه.
په دغه لیدنه کې، د هایدرو ډیزاین شرکت مسؤلینو او تخنیکي کارمندانو د خپلو کاري تجربو په هکله د اوبو محترم معین او مل پلاوي ته اړین معلومات وړاندې کړل او زیاته یې کړه، چې د اوبو په تنظیم او ډیزاین برخه کې یې یو شمېر پروژې په افغانستان او اروپایي هېوادونو کې پلي کړې دي. نوموړي شرکت په افغانستان کې د کجکي بند تحلیلي او زمینداور کانال د ډیزاین سربېره ځينې نورې پروژې هم ډيزاین کړې دي.
همدارنګه، د بارسو، سوایش او بیتیک شرکتونو مسؤلینو د اوبو له محترم معین سره په لیدنه کې په افغانستان کې د پانګونې او د اوبو پروژو د پلي کولو په برخه کې خپلې کاري تجربې شریکې کړې.
د یادونې وړ ده، چې تر دې وړاندې د اوبو محترم معین او ورسره مل پلاوي ترکیې هېواد ته د خپل سفر په ترڅ کې د کجکي بند لپاره د جوړوېدونکو دروازو جوړولو له بهیر څخه د لیدنې ترڅنګ، په انقره کې د افغانستان د اسلامي امارت له سفیر سره هم کتلي او په افغانستان کې د اوبو پروژو د تنظیم په برخه کې د ترکي او نورو هېوادونو د پانګوالو لپاره د آسانتیاوو برابرولو په هکله هم خبرې، اترې کړې دي.
