د اوبو او انرژي وزارت به ډېر ژر د ۴۲۰ میلیونه افغانیو په ټولیز ارزښت د لسګونو چکډمونو د پروژو چارې پیل کړي
د اوبو او انرژي د سرپرست وزیر محترم الحاج ملا عبداللطیف منصور تر رهبري لاندې د دغه وزارت د اوبو معین محترم مجیب الرحمن عمر آخندزاده، رئيسانو او تخنیکي مسؤلینو په ګډون د هېواد په 11 ولایتونو کې د چکډمونو د پروژو د چارو د پلي کولو په موخه د همغږۍ ناسته ترسره شوه.
دغه د همغږۍ ناسته چې د اوبو او انرژي وزارت د رهبري له لوري جوړه شوې وه، ټاکل شوې کمېټې ته دنده و سپارل شوه چې د نوموړو پروژو د پلي کولو چارې دې ژر تر ژره او په غوره توګه پرمخ یوسي
د یادونې وړ ده، چې په لومړي پړاو کې په هېواد کې د اوبو د مدیریت د بحران، د موسمي سیلابونو د مدیریت او کنټرول، د اوبو سرچینو د پیاوړتیا او د سیلابونو او وچکالیو د زیانونو د کموالي لپاره د هېواد په ۱۱ ولایتونو کې د ۱۴۰ چکډمونو د پروژو پلي کول د اوبو او انرژي وزارت ته سپارل شوی او د دغو پروژو لګښت په فوق العاده توګه د افغانستان د اسلامي امارت له لوري منظور شوی دی.
همدارنګه د یادونې وړ ده، چې د دغو پروژو په پلي کولو سره به له وچکالي سره د مبارزې، د اوبیزو سرچینو د مدیریت او پیاوړتیا په برخه کې یو مثبت او اغېزمن ګام واخیستل شي چې هېوادوال به مو د هېواد په اکثرو برخو کې ورڅخه برخمن شي.
