د اوبو او انرژي وزارت د اوبو معین د شکردرې له ولسوال سره په نوموړې ولسوالي کې د یوه چکډم جوړولو د ځای د ټاکلو په هکله خبرې، اترې وکړې
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د کابل د سیندیزې حوزې عمومي رئيس محترم انجنیر حبیب الرحمن حقپال، د کابل د منځني سیندیزې فرعي حوزې رئيس محترم مولوي ولي محمد تائب او یو شمېر تخنیکي مسؤلینو په شتون کې د کابل ولایت د شکردرې له ولسوال محترم شریف الله مسلم او د دغې ولسوالي له یو شمېر قومي مشرانو سره وکتل.
د اوبو محترم معین د شکردرې له ولسوال او قومي مشرانو سره په لیدنه کې په نوموړې ولسوالي کې د یوه چکډم د ځای د ټاکلو په هکله بحث او د اندونو تبادله وکړه. هغه په دغه لیدنه کې څرګنده کړه، چې په نوموړي ولسوالي کې دیوه چکډم د جوړولو د ځای ټاکلو په هکله به د وزارت د رهبري مقام له پرېکړې څخه وروسته اړین تصمیم ونیول شي.
