د اوبو او انرژي وزارت د اوبو معین د RED SEA او هوشنګ صالح زاده سوداګریزو شرکتونو له رئیسانو سره وکتل
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده د خپل کار په دفتر کې د RED SEA سوداګریز شرکت رئيس ښاغلي حاجي عارف الله ژوندون او د هوشنګ صالح زاده سوداګریز شرکت رئيس ښاغلي عبدالله هوشنګ صالح زاده سره وکتل.
په یاده ناسته کې، د یادو شرکتونو رئيسانو د اوبو او انرژي پروژو باندې د پانګونې لیوالیتا څرګنده کړه او زیاته یې کړه، په لومړي قدم کې دوی هوډ لري چې د افغانستان په یوه ولایت کې د ۵۰ میګاواټه په وړتیا د ډبرو له سکرو څخه د انرژي د تولید پر پروژې باندې پانګونه وکړي او تر هغه وروسته پر نورو لا زیاتو پروژو باندې پانګونه وکړي.
د اوبو معین د یادو کسانو څخه د اوبو د مدیریت او د انرژي د تولید پر پروژو باندې د پانګونې هر هکلی وکړ او هغوی ته یې د ملي ګټو په پام کې نیولو سره د هر راز همکاري ډاډ ورکړ.
همدارنګه د اوبو معین د دې ګډې همکاري په پلي کیدو باندې ټینګار وکړ او یادونه یې وکړه، چې د اوبو او انرژي وزارت رهبري د خصوصي سکتورونو له ونډې اخیستلو څخه د دې وزارت په پروژو کې د وزارت د قوانینو او تګلارو په پام کې نیولو سره هرکلی کوي.
