د اوبو او انرژي وزارت د رهبري ناسته ترسره شوه
د اوبو او انرژي وزارت د رهبري ناسته د وزارت د اوبو معین محترم مجیب الرحمن عمر آخندزاده تر رهبري لاندې د انرژي معین محترم الحاج ملا عبدالهادي یعقوب، د وزارت مقام د سلاکارانو، عمومي رئيسانو او یو شمېر تخنیکي مسؤلینو په شتون کې نن، یکشنبه، د ۱۴۰۴ هـ ل کال د لیندۍ میاشتې په ۲ نېټه د وزارت مقام د غونډو په تالار کې ترسره شوه.
په دغه ناسته کې، د وزارت اړوند بېلابېلو تخنیکي او اداري فعالیتونو په ځانګړې توګه د عادي او پراختیایي بودجې د لګښت، په ولایتونو کې د وزارت اړوند ملکیتونو د تثبیت او ورڅخه د ګټې اخیستنې د څرنګوالي په هکله بحث او د اندونو تبادله وشوه.
د ناستې په بهیر کې اړوندو رئيسانو د تخنیکي، مالي، تدارکاتي او پروژو پلي کولو د پرمختګونو په برخه کې خپل راپورونه وړاندې کړل.
د اوبو محترم معین د راپورونو تر اورېدلو وروسته، د پروژو د وضعیت د پرمختګ او عادي او پراختیایي بودجې د څرنګوالي په ارزولو سره، د چارو د چټکتیا او کاري بهیر د غورهوالي په هکله اړوندو مسؤلینو ته اړینې لارښوونې وکړې.
