د اوبو او انرژي وزارت د عوت او ارشاد ریاست روزنیز او اصلاحي سمینار د دعوت او ارشاد د موخو او ارزښتونو په هکله ترسره شو
یاد سمینار د اوبو او انرژي وزارت د اوبو معین محترم مجیب الرحمن عمر آخندزاده، د افغانستان اسلامي امارت د دعوت او ارشاد لوی رئيس محترم شیخ محمد هاشم شهید ورور، د اوبو او انرژي وزارت د دعوت او ارشاد رئيس محترم مولوي ګل رحمن عارف او دکلیو پراختیا وزارت د دعوت او ارشاد رئيس محترم مفتي احسان الله ابوالفیضان په ګډون د اوبو او انرژي وزارت د غونډو په تالار کې ترسره شو.
د یاد سمینار په پيل کې د اوبو او انرژي وزارت د جومات د ملا امام محترم سید هارون له خوا د قرآن کریم څو آیاتونه تلاوت شول او وروسته د اوبو او انرژي وزارت د اوبو معین محترم مجیب الرحمن عمر آخندزاده د عبادت او اخلاص په هکله خبرې وکړې.
د اوبو ښاغلي معین په خپلو خبرو کې د دې وزارت کارمندانو ته وویل چې د افغانستان د خلکو مسؤلیت زمونږ ټولو په غاړه دی، چې د خپل موقف څخه د هېواد او هېوادوالو ته د خدمت رسولو په لاره کې په رښتینې توګه ګټه واخلو او د اسلام سپیڅلي دین ارشاداتو ته ژمن و اوسو.
د سمینار په دوام کې، د اوبو او انرژي وزارت د دعوت او ارشاد رئيس محترم مولوي ګل رحمن د دعوت او ارشاد د موخو او ارزښتونو په هکله خبرې وکړې.
په ورته مهال، د افغانستان اسلامي امارت د دعوت او ارشاد لوی رئيس محترم شیخ محمد هاشم شهید ورور یادونه وکړه چې د افغانستان اسلامي امارت د ټولې نړۍ په مقابل کې ودرېده او په خپل ایمان او سرښندنه سره د افغانستان د ځمکنۍ بشپړتیا څخه دفاع وکړه او وتوانیده چې د نړۍ زبرځواکونو ته ماته ورکړې.
د دعوت او ارشاد لوی رئيس د دیني علومو ارزښت ته په اشاري سره د اوبو او انرژي وزارت له ټولو کارمندانو څخه وغوښتل چې د اسلام سپیڅلي دین ارشادات او د حضرت محمد (ص) سنتونه په خپل ژوند کې عملي کړي.
په پای کې د کلیو پراختیا وزارت د دعوت او ارشاد رئيس محترم مفتي احسان الله ابوالفیضان د بېلابېلو موضوعاتو او په ځانګړې توګه د دیني علومو په زده کولو باندې ټینګار وکړ او ټول ګډونوال یې رښتینې خدمت رسولو ته وهڅول.
