د اوبو او انرژي وزارت د پروژو د چارو د تطبیق د چټکتیا په هکله د ملي پراختیا شرکت له مسؤلینو سره د همغږي ناسته ترسره شوه
د اوبو او انرژي وزارت د اوبو معین ښاغلي مجیب الرحمن عمر آخندزاده د ملي پراختیا شرکت د تولید او سوداګري مرستیال او د تخنیکي معاونیت سرپرست ښاغلي ریاض الدین شریفي سره د یوې ناستې په ترڅ کې د اوبو او انرژي وزارت د پروژو د پلي کولو په هکله بحث او د اندونو تبادله وکړه.
په یاده ناسته کې د دواړو لورو ترمنځ د ۴۲ منځنیو او کوچنیو بندونو د پروژو د پلې کولو په هکله چې د اوبو او انرژي وزارت مخکي له یاد شرکت یې سره تړون لاسلیک کړی و او په ځانګړې توګه د ارزګان ولایت د شفلوغ بند او د پکتیکا ولایت د پلتوني بند په هکله په هر اړخیزه توګه بحث ترسره شو.
د اوبو او انرژي وزارت د اوبو معین په یاده لیدنه کې پر لازیاتې همغږي باندې تینګار وکړ او د ملي پراختیا شرکت له مسؤلینو څخه و غوښتل چې د دې وزارت د پروژو د پلي کولو چارې چټکي کړي.
په ورته مهال، د ملي پراختیا شرکت مرستیال د پروژو له اهمیت څخه یادونه وکړه او ډاډ یې ورکړ چې د ملي پراختیا شرکت به د دې وزارت د پروژو د چارو په پلي کولو کې لا زیاته هڅه وکړي.
