د اوبو او انرژي وزارت د ۱۴۰۳ مالي کال د بودجې د څېړلو او له هغې څخه د اغېزمنې ګټې اخیستنې لارو، چارو په هکله د دغه وزارت د رهبري ناسته ترسره شوه
دغه ناسته د اوبو او انرژي سرپرست وزیر محترم الحاج ملا عبداللطیف منصور تر رهبري لاندې د دغه وزارت د انرژي معین محترم مولوي حمدالله زاهد، د اوبو معین محترم مجیب الرحمن عمر آخندزاده، سلاکارانو او عمومي رئيسانو په شتون کې ترسره شوه.
په دغه ناسته کې، د بېلابېلو موضوعاتو لکه: په ۱۴۰۳ مالي کال کې د وزارت د عادي او پراختیایي بودجې، د اوبو او انرژي پراختیایي پروژو د وضعیت، د پروژو لومړیتوب بندي او له پراختیایي بودجې څخه د غوره او اغېزمنې ګټې اخیستنې په موخه د بنسټیزو لارو، چارو په هکله بحث او د اندونو تبادله وشوه.
د ناستې په بهیر کې د هرې موضوع په هکله په مفصله او هر اړخیزه توګه بحث وشو او اړین تصمیمونه ونیول شول.
د اوبو او انرژي سرپرست وزیر ټینګار وکړ، چې د دغه وزارت د پروژو شمېر ته په کتو سره زمونږ بودجه محدوده ده، له همدې کبله اړینه ده، چې زمونږ ډېر پام پر هغو پروژو باندې و اوسي، چې د ډېر لومړیتوب او ارزښت درلودونکې وي؛ ترڅو وکولای شو له لږو امکاناتو څخه تر ټولو ډېره ګټه پورته کړو او په هېواد کې د انرژي او اوبو د مدیریت د پراختیا په برخه کې ترټولو غوره لاسته راوړنې ولرو.
