د اوبو او انرژي وزارت سرپرست وزیر د ترکیې هېواد د ادیف خیریه بنسټ له مسئولینو سره وکتل
د اوبو او انرژي وزارت سرپرست وزیر محترم الحاج ملا عبداللطیف منصور د ترکیې هېواد د ادیف خیریه بنسټ له مسئولینو سره وکتل او د ګډو همکاریو په هکله یې خبرې اترې وکړې.
د اوبو او انرژي وزارت سرپرست وزیر د نوموړي بنسټ مسئولینو ته د ښه راغلاست ویلو ترڅنګ، په بېلابېلو برخو په ځانګړې توګه د دیني برنامو د پیاوړتیا په برخه کې ددوی د همکاري او لیوالتیا څرګندولو ستاینه وکړه.
په ورته مهال، د ادیف خیریه بنسټ مسئولینو هم د اوبو او انرژي وزارت سرپرست وزیر ته د دیني مدرسو، دارالایتامونو، جوماتونو او نورو عام المنفعه برنامو د پیاوړتیا په برخه کې د همکاري ډاډ ورکړ.
د یادونې وړ ده، چې څه موده وړاندې د اوبو او انرژي وزارت د جومات د بیارغونې پروژه هم د نوموړي بنسټ له لوري پلي شوه او همدارنګه، د پکتیا ولایت په زرمت ولسوالي کې د خاتم الانبیاﷺ دارالایتام ودانۍ هم څه موده وړاندې د یاد بنسټ په همکاري د اوبو او انرژي وزارت د سرپرست وزیر له لوري پرانیستل شوه.
