د اوبو او انرژي وزارت سرپرست وزیر په ازبکستان کې د یو مېشت افغان پانګوال سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د ازبکستان هېواد په پلازمینه تاشکند کې د یو افغان پانګوال ښاغلي حاجي خیرالدین مایل سره وکتل او په افغانستان کې یې د اوبو ذخیروي بندونو د جوړولو او د انرژي د تولید په پروژو کې د پانګونې په هکله بحث او د اندونو تبادله وکړه.
په یاده لیدنه کې د اوبو او انرژي وزارت سرپرست وزیر په ازبکستان کې د یاد پانګوال څخه و غوښتل چې په یاد هېواد کې مېشت افغان پانګوال دې ته وهڅوي چې په افغانستان کې د اوبو بندونو د جوړلو او د انرژي د تولید په پروژو کې پانګونه وکړي.
د یادولو وړ ده، چې د اوبو او انرژي وزارت سرپرست وزیر د یوه پلاوي په رهبري ازبکستان هېواد ته د وارداتي برېښنا د قرارداد د غځولو او د برېښنا د ستونزو د هوارولو په موخه سفر کړی، چې تېره ورځ د افغانستان او ازبکستان هېوادونو ترمنځ د 2023 کال لپاره د وارداتي برېښنا قرارداد وغځول شو.
