د اوبو د بندونو او د انرژي د تولید په سترو پروژو کې د پانګونې په موخه د اس ک ام ترکي شرکت له مسؤلینو سره د همغږۍ ناسته ترسره شوه
د اوبو او انرژي سرپرست وزیر محترم الحاج ملا عبداللطیف منصور د اس ک ام هواسلیک انونیوم شرکت د مدیره پلاوي له رئيس محترم دوکتور عباس رسول زاده فرساد او د ترکیې هېواد د بایوس انرژي شرکت له استازو سره د انرژي د تولید او د ذخیروي بندونو د جوړولو په پروژو کې د پانګونې د پيل د همغږۍ په موخه بحث او د اندونو تبادله وکړه.
د اوبو او انرژي سرپرست وزیر په دغه ناسته کې د دغه وزارت د سترو پروژو ارزښت ته نغوته(اشاره) وکړه او همدارنګه یې د باغدرې د برېښنا بند، د سروبي ۲ برېښنا بند او د شاه توت للندر د اوبو د ذخیره کولو بند پروژې نوموړي شرکت ته د پانګونې په موخه وړاندې کړې.
په ورته مهال، د نوموړو شرکتونو مسؤلینو هم د پانګونې د پيل په موخه خپل چمتووالی څرګند کړ او هوکړه وشوه، چې د وزارت تخنیکي مسؤلین دې د نوموړو شرکتونو له مسؤلینو سره د پروژو معلومات شریک کړي او همدارنګه د پروژو له سیمو څخه دې هم لیدنه وکړي.
د یادونې وړ ده، چې څه موده وړاندې د اوبو او انرژي وزارت او د اس ک ام ترکي شرکت ترمنځ د همکاري هوکړه لیک لاسلیک شوی او د نوموړي شرکت مسؤلینو د افغانستان په ۳۴ ولایتونو کې پانګونې ته لېوالتیا څرګنده کړې وه.
