د باغدرې د برېښنا بند د تخنیکي او مالي پروپوزلونو د څیړلو په موخه د همغږۍ ناسته ترسره شوه
دغه ناسته د اوبو ا وانرژي وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشري لاندي د رئیسانو، تخنیکي مسئولینو او د پلي کوونکي شرکت د استازي په ګډون په حضوري او آنلاین ډول ترسره شوه.
په دې ناسته کې د کاپیسا ولایت د باغدرې د برېښنا بند پروژې تخنیکي او مالي پروپوزلونه وڅیړل شول او د یادو پروپوزلونو د ښه والي او د ستونزو د حل په هکله بحث او د اندونو تبادله وشوه.
همدارنګه، د یادې ناستې په ترڅ کې د اوبو او انرژي وزارت او د پلي کوونکي شرکت مسئولینو، خپل وړاندیزونه او اندونه د نوموړي پروپوزل په هکله وړاندې کړل او پر لازیاتي همغږۍ او د چارو پر چټکتیا باندې یې ټینګار وکړ.
