د ترکیې هېواد د علماو یوې ډلې د اوبو او انرژي له سرپرست وزیر سره په لیدنه کې ژمنه وکړه، چې ترکي پانګوال به په افغانستان کې پانګونې ته وهڅوي
د اوبو او انرژي سرپرست وزیر محترم الحاج ملا عبداللطیف منصور د ترکیې هېواد د اډیف خیریه بنسټ د علماو او مسؤلینو له یوې ډلې سره وکتل او د بېلابېلو سیاسي، دیني او ټولنیزو مسائلو په هکله بحث او د اندونو تبادله وکړه.
په دغه لیدنه کې، د اوبو او انرژي سرپرست وزیر په افغانستان کې د نوموړي بنسټ عام المنفعه چوپړتیاوې وستایلې او په افغانستان کې د انرژي د تولید لپاره د کافي سرچینو د شتون په یادونې سره یې وویل، چې اوسمهال په هېواد کې له هره پلوه د پانګونې لپاره زمینه چمتو ده.
ښاغلي منصور د ترکیې هېواد علماو ته ډاډ ورکړ، چې د افغانستان اسلامي امارت د پانګوالو د ځان او مال خوندیتوب ته ژمن دی او په دې برخه کې هر ډول آسانتیاوې رامنځته شوې دي.
په ورته مهال، د ترکیې هېواد د د اډیف بنسټ مسؤلینو هم ژمنه وکړه، چې ترکي سوداګر به په افغانستان کې د پانګونې لپاره وهڅوي.
