د ترکیې هېواد یو شمېر پانګوالو په افغانستان کې د اوبیزو پروژو د پليکولو په برخه کې پانګونې ته لېوالتیا څرګنده کړه
8/9/1404 هـ ل
د اوبو او انرژي وزارت د اوبو معین محترم مجیب الرحمن عمر آخندزاده د ترکیې هېواد د پانګوالو له یوې ډلې او د عوفي بهرام شرکت له رئيس سره د دغه وزارت د غونډو په تالار کې د یوې ناسته په ترڅ کې خبرې، اترې وکړې.
په دغه لیدنه کې، دواړو لورو په افغانستان کې داوبو په برخه کې د زیربنایي پروژو د پلي کولو په برخه کې د پانګونې فرصتونو او د ترکي شرکتونو د مشارکت په هکله بحث او د اندونو تبادله وکړه.
د اوبو معین، مهمې پروژې لکه د کابل – پنجشیر د اوبو لېږد پروژه، د للندر شاتوت بند پروژه او څو نورې مهمې پروژې، ترکي لوري ته د پانګونې لپاره د مناسبې زمینې په توګه وړاندیز کړې.
ترکي پانګوالو هم همکاري ته د لېوالتیا په څرګندولو سره ډاډ ورکړ، چې په افغانستان کې د اوبیزو پروژو د پلي کولو په برخه کې پانګونې او مشارکت ته بشپړ چمتووالی لري او نور عملي اقدامات به تر لاس لاندې ونیسي.
