د سرپل ولایت سیندیزې فرعي حوزې مسؤلانو د دې ولایت په مرکز او ولسوالیو کې د خوړو د بحران د مخنیوي لپاره د خوړو په مقابل کې د کار پروګرام پرانیست.
د خوړو په مقابل کې د کار پروګرام د سرپل ولایت د سیندیزې حوزې ریاست د کلیو او بیارغونې ریاست او د شهدا او معلولینو ریاست په همکاري د سرپل ولایت په توغني، خیرآباد او آسیا آباد کلیو کې رسما پرانیستل شوه.
د سرپل ولایت د سیندیزې فرعي حوزې رئیس مولوي عبدالوکیل یاسر د دې پروګرام په پرانیست غونډه کې د سرپل ولایت په توغني کلي کې وویل: د اسلامي مارت مشرانو تصمیم نیولی چې دهغو کسانو لپاره چې د بیوزلۍ او د کار نه شتون څخه سرټکوي د خوړو په مقابل کې د کار پروګرام په لاره واچوي، ترڅو د دې لارې د بیوزلو کسانو سره مرسته وکړي.
هغه زیاته کړه: ۱۳۰۹ متریک ټنه غنم د سرپل ولایت ونډه د خوړو په مقابل کې د کار پروګرام څخه وه چې په پشپړ ډول د مزارشریف د سیلو څخه دې ولایت ته لېږدول شوي دي او همدارنګه د ولسوالیو ونډه هم لېږدول شوي ده چې کار مو په همهاله ډول پیل کړه چې د ۱۲۰۰۰ زره تنو په شاوخوا کې د ولایت په مرکز کې په کار ګمارل شوي دي.
د سرپل ولایت د سیندیزې حوزې رئيس مولوي عبدالوکیل یاسر وویل: د دې پروګرام له لارې مونږ د خپلې ګټې لپاره کار کوو او حکومت زمونږ د ملاتړ لپاره غنم راکوي، او د خلکو او بزګرانو څخه و غوښتل چې خپل کار په رښتیني ډول ترسره کړي
د یادولو وړ ده، چې د دې پروژې په واسطه د عمومي او فرعي کانالونو کیندنه او د سیند په څنډو کې تحکیم کاري او په لسګونه نورې ټولګټې پروژې ترسره شوې او د زرګونو کسانو لپاره د کار زمینه چمتو شوي چې په ورځنې ډول د دې ولایت په مرکز او کلیو کې تر ۸۰۰ ډېر کسان په کار بوخت دي.
