د غور ولایت د پورتني هریرود سیندیزې فرعي حوزې رئیس د یاد ولایت سویل لویدیځ شپږو ولسوالیو ته سفر وکړ
د غور ولایت د پورتني هریرود سیندیزې فرعي حوزې رئیس محترم الحاج ملا رحمت الله اماني د یاد ولایت د سویل لویدیځ شپږو ولسوالیو د ځمکې لاندې او سطحي اوبو د وضعیت د څیړلو او د معلوماتو راټولولو په موخه یادو ولسوالیو ته سفر وکړ او د نوموړو ولسوالیو د هغو کلیو له قومی مشرانو او اوسیدونکو سره، چې د وچکالیو له امله زیانمن شوې دي، په لیدنو کې یې د کرنیزو ځمکو او څښاک پاکو اوبو د کمښت په هکله بحث او د اندونو تبادله وکړه.
د دغو ناستو په ترڅ کې د غور ولایت د پورتني هریرود سیندیزې فرعي حوزې رئیس د یادو ولسوالیو اوسیدونکو ته ډاډ ورکړ، چې ددوی ستونزې به د افغانستان اسلامي امارت له مسؤلینو سره شریکې کړي او همدارنګه به هڅه وکړي چې د اړوندو ادارو سره په همغږۍ نوموړې ستونزې هواري کړي.
