د فساد د له منځه وړلو او برېښنا د ضایعاتو کموالي په موخه د جنکشنونو له مسوولینو سره د برېښنا شرکت د رهبرۍ ناسته
د فساد د له منځه وړلو او برېښنا د ضایعاتو کموالي په موخه د جنکشنونو له مسوولینو سره د برېښنا شرکت د رهبرۍ ناسته
د افغانستان برېښنا شرکت عمومي اجرائیوي رئیس حافظ محمد آمین نن د جنکشنونو له مسئولینو سره د یوې ناستې په ترڅ کې ټینګار وکړ چې باید د برېښنا د ضایعاتو او د فساد مخه ونیول شي. نوموړي د جنکشنونو له ټولو مسئولینو وغوښتل چې د برېښنا رسونې د پراختیا او د عوایدو راټولو لپاره دې پوروړو پېرودونکو د برېښنا او ترو مزو د پرې کولو لړۍ ته دوام ورکړي، او په دې برخه کې دې لازمي هلې ځلې وکړي.
دغه راز د برېښنا شرکت عمومي رئیس زیاته کړه هغه چا که پورته موارد په نظر کې ونه نیول قانوني چلند به ورسره وشي.
په ورته وخت کې د برېښنا شرکت عملیاتي رئیس انجنیر صفيالله احمدزي وویل، د اداري فساد او د برېښنا د ضایعاتو د له منځه وړلو لپاره باید ټول په ګډه کار وکړو او پرې نږدو چې پورته مسایل د برېښنا خدمات ټکني کړي. نوموړي زیاته کړه د برېښنا د مسوولیو او پېرودونکو ترمنځ باید واټن له منځه لاړ شي، د میترونو مامورین باید میترونه په دقت سره ووایي، د صندقونو کلیانې باید د ساحې له مسوول سره وي، د برېښنا له غلو او هغه کارکوونکي چې د فساد لپاره زمینه برابروي باید قانوني او جدي چلند ورسره وشي.
ورته مهال د کابل برېښنا رئیس فضل الرحمن فضلي ټینګار وکړ چې د برېښنا شرکت رهبري د برېښنا د ضایعاتو د کمولو په موخه د ترو مزو او باقیدارو میترونو د برېښنا پرې کولو لړۍ ته دوام ورکړی د داسې قضیو له عاملینو سره به قانوني چلند وشي.
د یادونې وړ ده چې له څو ورځو راهیسې د افغانستان برېښنا شرکت د کارکوونکو له لورې په مرکز او ولایاتو کې په لسګونو ترو مزي او باقیداره میترونه پرې شوي دي.
