د مرحوم حاجي عبدالظاهر د مړینې په هکله د اوبو او انرژي سرپرست وزیر محترم الحاج ملا عبداللطیف منصور د غمرازۍ پيغام
په ډېرې خواشینۍ سره مې خبر تر لاسه کړ، چې ملي او جهادي شخصیت مرحوم حاجي عبدالظاهر له هېواد څخه بهر د اجل داعي ته لبیک ویلی او د تل لپاره یې له دې نړۍ څخه سترګې پټې کړې.
مرحوم حاجي عبدالظاهر یو رښتینی او مخلص مجاهد وو، چې د خپل ژوند ډېره برخه یې د ښکیلاکګرو په وړاندې جهاد او مبارزې ته ځانګړې کړې وه او له مجاهدینو او علماو سره یې تل خواخوږي او اخلاص درلود.
له همدې کبله خپل د تسلیت مراتب د مرحوم درنې کورنۍ، ټولو دوستانو او خواخوږو ته وړاندې کوم، او خپل ځان له تاسو سره په دغه غم کې شریک ګڼم.
د خدای(ج) له دربار څخه مرحوم ته جنت الفردوس او د هغه درنې کورنۍ، دوستانو او خواخوږو ته د عظیم اجر، جمیل صبر او نعم البدل غوښتنه کوم.
