د هرات ولایت د پاشدان اوبولګولو او برېښنا د تولید بند پروژه ګټې اخیستنې ته و سپارل شوه

نن، د ( ۱۴۰۴ لمریز کال د زمري ۲۳) د هرات ولایت د کرخ ولسوالي د پاشدان د اوبولګولو او برېښنا د تولید بند پروژه چې د اوبو او انرژي وزارت یوه له سترو پروژو څخه ګڼل کېږي، د دغه وزارت له لوري د هېواد د خپلواکي د بېرته اخیستلو او اسلامي امارت د بریا د څلورمې کلیزې په مناسبت، ګټې اخیستنې ته وسپارل شوه.

د دغې پروژې ګټې ته د سپارلو په مراسمو کې د ریاست الوزرا اقتصادي مرستیال محترم الحاج ملا عبدالغني برادر، د اوبو او انرژي وزیر محترم الحاج ملا عبداللطیف منصور، د هرات والي محترم شیخ نور احمد اسلام‌جار، د افغانستان د اسلامي امارت ویاند محترم مولوي ذبیح الله مجاهد، د اسلامي امارت د لوړ پوړو مسؤلینو، علماوو، قومي مشرانو، تخنیکي مسؤلینو او د سیمې ګڼ شمېر اوسېدونکو ګډون درلود.

د ریاست الوزرا اقتصادي مرستیال په دغو مراسمو کې وویل چې د اوبو مدیریت د افغانستان اسلامي امارت له مهمو لومړیتوبونو څخه دی؛ ځکه چې په هېواد کې د اقتصاد د ودې، د کارموندنې په رامنځته‌کولو او د مهاجرت پر کموالي باندې نېغه اغېزه لري. هغه زیاته کړه، چې د پاشدان بند په هېواد کې د اقتصادي پراختیا په برخه کې د اسلامي امارت یو له سترو ګامونو څخه دی او د هرات ولایت د خلکو لپاره د حیاتي ارزښت درلودونکی دی.

په ورته مهال، د اوبو او انرژي وزیر په دغه برنامه کې وویل، چې اسلامي امارت په ډېرو لږو امکاناتو سره په هېواد کې سترې پروژې پلې کړې او د هېواد د آبادۍ په لار کې د کوټلو ګامونو په اخیستلو سره یې نړۍ حیرانه کړې.

هغه زیاته کړه، چې اسلامي امارت همدارنګه په هېواد کې شرعي نظام، امنیت او اقتصادي پراختیا راوړې، له همدې کبله ملت هم باید د دغه نظام په قدر پوه شې او له دغه نظام څخه په خپل ملاتړ او اطاعت سره د دغه الهي نعمت شکر پر ځای کړي.

ښاغلي منصور یادونه وکړه، چې د پاشدان بند د پلي کولو څخه موخه د اوبو مدیریت، د اوبو سرچینو پياوړتیا، د کرنې او اقتصاد وده ده، او له نیکه مرغه، نن د دغه بند په بشپړېدو سره د دغو ارزښتناکو موخو د تر لاسه کېدو شاهدان یو.

همدارنګه، د هرات والي د پاشدان بند ارزښت د دغه ولایت د خلکو د کرنې او اقتصاد په برخه کې حیاتي وباله.

له بلې خوا، د افغانستان د اسلامي امارت ویاند محترم مولوي ذبیح الله مجاهد یادونه وکړه، چې د اوبو او انرژي وزارت په هېواد کې ګڼې پراختیايي برنامې پلې کړې او د اوبو د مدیریت او انرژي د پراختیا په برخه کې د پام وړ فعالیتونه ترسره کړي دي.

د یادونې وړ ده، چې پاشدان بند د ۵۴ میلیون متره مکعب اوبو د زېرمه کولو، ۱۳ زر هکتاره کرنیزې ځمکې د خړوبولو او ۲ مېګاواټه برېښنا د تولید وړتیا لري.

دغه بند به په هرات ولایت کې د کرنې، اقتصادي ودې او کارموندنې په برخه کې نوی باب پرانیزي.