د پروان ولایت د انرژي ولایتي کمېټه جوړه شوه
د پروان ولایت د انرژي ولایتي کمیټه د یاد ولایت د مقام تر رهبري لاندې د غوربند چاريکار سيندېزې فرعي حوزې، اقتصاد، چاپېریال ساتنې، برېښنا، صنعت او سوداګرۍ او د کلیو پراختیا ریاستونو او د علماوو شورا، د زون په کچه د انرژي چارو د تنظیم آمریت او د ځوانانو شورا په غړیتوب سره جوړه شوه.
د نوموړې کمیټې د جوړولو په غونډه کې د پروان مرستیال والي مفتي محمد ادریس انوري او د غوربند چاريکار سيندېزې فرعي حوزې رئیس انجینر مجیب الرحمن حبیبي د نوموړي کمیټې او په یاد ولایت کې له داخلي سرچینو څخه د انرژي د تولید د ارزښت او د خصوصي پانګونې د جذبولو په هکله هر اړخیزې خبرې وکړې.
همدارنګه، د مرکز څخه راغلي پلاوي د یادې کمېټې د جوړېدو د موخو، دندو، تشکیلاتو او په پروان ولایت کې د انرژي د تولید لپاره د شته سرچينو لکه باد، لمر او اوبو څخه د استفادې په هکله اړین معلومات وړاندې کړل.
د یادونې وړ ده، چې نوموړې کمیټه په پروان ولایت کې د اړوندو ولایتي ادارو په همغږي سره د انرژي پالیسو جوړولو، ښاري او کلیوالو سیمو ته د ارزانه او دوامداره انرژي رسولو او د انرژي د تولید په برخه کې د خصوصي پانګونې د جذبولو په موخه جوړه شوې ده.
