د ځمکې لاندې اوبو څانګې د ظرفیت لوړونې ورکشاپونو د پای برنامه ترسره شوه
دغه برنامه د اوبو او انرژي وزارت د اوبو معین محترم مجیب الرحمن عمر آخندزاده، د وزارت مقام د سلاکار محترم ډاکټر فاروق اعظم، یو شمېر رئيسانو، د کلیو د بیارغونې او پراختیا وزارت، د چاپیریال ساتنې ملي ادارې او د ښاري اوبو رسولو او فاضلابو شرکت د استازو او د سیندیزو حوزو د انجنیرانو او آمرینو په شتون کې چې د ځمکې لاندې اوبو د سرچینو ریاست د متخصصینو له لوري د جیوفزیک او د ځمکې لاندې اوبو ورکشاپونو کې ورته روزنه ورکړل شوې وه، د اوبو او انرژي وزارت د کنفرانسونو په تالار کې ترسره شوه.
په دغه برنامې کې د اوبو او انرژي وزارت د اوبو معین محترم مجیب الرحمن عمر آخندزاده د اقلیمي بدلونونو، د پرله پسې وچکالیو او د اوبو سرچینو ورځ تر بلې کمښت ته په اشارې سره ټینګار وکړ، چې د اوبو د مدیریت لپاره اړینه ده چې حکومت او ولس خپل مسئولیتونه په ښه توګه ترسره کړي.
په ورته مهال، د وزارت مقام سلاکار محترم ډاکټر فاروق اعظم په اوسنیو شرایطو کې د اوبو د مدیریت ارزښت ته په اشارې سره د دغو ورکشاپونو ترسره کول ارزښتناکه وبلله.
همدارنګه، په دغه برنامې کې د ځمکې لاندې اوبو د سرچینو رئیس محترم عزیزالرحمن عزیز، د اوبو او انرژي وزارت د دعوت او ارشاد رئیس محترم مولوي ګل الرحمن عارف او د اوبو سرچینو یو شمېر نورو متخصصینو ددغو ورکشاپونو د ارزښت او د هغوی د منځپانګو په هکله اړین معلومات وړاندې کړل.
د یادونې وړ ده، چې دغه روزنیز ورکشاپونه د ځمکې لاندې اوبو د سرچینو ریاست له لوري د سیندیزو حوزو د ځمکې لاندې اوبو د انجنیرانو او آمرینو د مسلکي وړتیا لوړولو په موخه ترسره شوي او نن ددغه ورکشاپونو د پای په برنامې کې ګډونوالو ته تصدیق پاڼې هم ورکړل شوې.
