د یوه افغان شرکت مسؤلینو او چینایي شریکانو یې د اوبو او انرژي له سرپرست وزیر سره په لیدنه کې د برېښنا د تولید بندونو په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د دغه وزارت د پانګونې د جذب د رئيس محترم انجنیر دادمحمد زرمتي په شتون کې د حسیب صفي عاشوري سوداګریز شرکت له رئيس محترم عبدالحمید عاشوري او چینایي شریکانو ښاغليو Alex Chen او SuTuan سره وکتل.
په دغه لیدنه کې د نوموړي شرکت رئيس او چینایي شریکانو یې په افغانستان کې د برېښنا د تولید بندونو د جوړولو په پروژو کې پانګونې ته لېوالتیا څرګنده کړه او په دې برخه کې یې د همکاري غوښتنه وکړه.
په ورته مهال، د اوبو او انرژي سرپرست وزیر په دغه لیدنه کې په افغانستان کې د برېښنا بندونو د جوړولو په پروژو کې د نوموړي شرکت د پانګونې د لېوالتيا د هر کلي ترڅنګ، هغوی ته وړاندیز وکړ، چې د ګلبهار بند، باغدرې بند، په بغلان ولایت کې د کیله ګي بند ، په تخار ولایت کې د مامي کلا بند او په بادغیس ولایت کې د مرغاب پر سیند باندې د بند جوړولو په پروژه کې پانګونه وکړي او زیاته یې کړه، چې اوسمهال په افغانستان کې له هره پلوه د پانګونې لپاره زمینه چمتو شوې ده او مونږ په دې برخه کې هر راز همکاري ته چمتو یو.
همدغه راز، ښاغلي Alex Chen د نوموړي شرکت شریک په دغه لیدنه کې د اوبو او انرژي سرپرست وزیر ته د دوی له شرکت څخه د لیدنې په موخه چین هېواد ته د سفر بلنه هم ورکړه.
د دغې لیدنې په پای کې په پروژو کې د پانګونې په موخه د عملي چارو پر پیل باندې ټینګار وشو.
د یادونې وړ ده، چې په افغانستان کې د اسلامي امارت په بیا واکمنېدو سره د اوبو او انرژي د تولید په پروژو کې پانګونې ته د کورنیو او بهرینو شرکتونو لېوالتیا ډېره شوې ده.
