د یوه چینایي شرکت مسؤلینو د اوبو او انرژي له سرپرست وزیر سره په لیدنه کې په کنړ ولایت کې د برېښنا د تولید په دریو سترو بندونو باندې د پانګونې لپاره لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د یوه چینایي شرکت له مسؤلینو سره وکتل او په کنړ ولایت کې د دریو سترو بندونو ( شال، ساګي او سرتاق) د برېښنا د تولید په پروژو کې د پانګونې په هکله بحث او د اندونو تبادله وکړه.
په دغه لیدنه کې، د چینایي شرکت مسؤلینو په نوموړو پروژو کې د پانګونې لپاره لېوالتیا څرګنده کړه او زیاته یې کړه، چې چمتو یو چې ډېر ژر له دغه وزارت سره د همکاري هوکړه لیک لاسلیک کړو او په عملي توګه خپلې چارې پیل کړو.
په ورته مهال، د اوبو او انرژي سرپرست وزیر د برېښنا د تولید په بندونو کې د نوموړي شرکت د پانګونې د لېوالتیا هرکلی وکړ او یادونه يې وکړه، چې د کنړ سیند په اوبو کې د برېښنا د تولید لپاره په کافي توګه وړتیا شتون لري که چیرې په راتلونکي کې ټول دغه بندونه جوړ شي، افغانستان ان تر دې کولای شي چې ټولو ګاونډیو هېوادونو ته برېښنا صادره کړي.
د اوبو او انرژي سرپرست وزیر د نوموړي شرکت مسؤلینو ته د دغه وزارت د همکاري په برخه کې د پانګونې لپاره د زمینې د چمتو کولو لپاره ډاډ ورکړ او ټینګار یې وکړ، چې غوره ده چې عملي چارې دې ډېر ژر پیل شي.
