د یوې مؤسسې مسؤل د پروژو د لا غوره پلي کولو په برخه کې د بامیان د اوبو او انرژي له ریاست څخه د همکاري غوښتنه وکړه
د بامیان د اوبو او انرژي رئيس محترم ملا محمد داود علي په بامیان کې مېشت د یو، این، دي، پي مؤسسې له مسؤل محترم الفت الله ملنګیار سره وکتل او په یاد ولایت کې د پروژو د لا غوره پلي کولو په هکله بحث او د اندونو تبادله وکړه.
په دغه لیدنه کې، د نوموړې مؤسسې مسؤل د څنډو د ټینګښت، کرنیزو کانالونو او چکډمونو په هکله د خپلو چمتو شوو پلانونو په هکله اړین معلومات وړاندې کړل او د دغو پروژو د لا غوره پلي کولو په برخه کې د همکاري غوښتنه وکړه.
په ورته مهال، ښاغلي داود علي د نوموړو پروژو پلي کول د بامیان ولایت د خلکو لپاره د ستونزو او ننګونو د هوارولو په برخه کې اړینه اړتیا وبلله او په دې برخه کې یې د همکاري ژمنه وکړه.
